Usum Balon (1)

Rékacipta Féndy Sy Citrawarga

“BALON, balon, baradé baloooon?”
“Di dieu mah teu aya murangkalih, katingali panginten, Kang?”
“Tah di dieu Ayi Dadang lepat téh.”
“Saha Ayi Dadang téh, Kang?”
“Sumuhun tah Ayi éta nu nyebatkeun di dieu mah teu aya murangkalih….”
“Hahahaaa……ieu mah sanés Dadang, Kang, Ujin. Lengkepna mah Ujin Surojin.”
“Lah, lepat sakedik mani diprotés.” 
“Lepat sakedik kumaha ari Akang? Jauh-jauh ti Ujin ka Dadang?”
“Hoyong caket? Kantétkeun janten Ujin Dadang atanapi dibalikkeun Dadang Ujin.”
“Lah, sok aya-aya baé si Akang mah.”
“Janten moal mésér nyah balon téh?”
“Moal Kang, jang nanahaon balon?”
“Jih, Ayi mah mani belet nya. Di mana-mana gé balon mah tiupeun, sanés tuangeun. Upami ditiup da balon mah aya liangan, tantos melendung. Kumaha wé istri apan melendung téh saatos ditiup heula, nya Tanteu Véra?”
“Gustiiiii….éta geus sangeunahna deui ngalandi ngaran batur!”
“Ari atos saha kitu namina Yi?”
“Ieu téh Bi Rahi lain bet Tanteu Véra.”
“Yéy éta nami mani Bi Rahi, mani teu gaul. Potongan bodi yahut,  imbit dempok, dada montok kieu mah payusna disebat Tanteu Véra.”
“Ah nu bener?”
“Jih, yakinlah. Sok gentos wé tong nami Bi Rahi, janten Tanteu Véra. Okéy?”
“Okéy lah!”
“Naon nu okéy téh Bi?”
“Enya ngaran Bibi diganti jadi Tanteu Véra, Min.”
“Moal enya ganti ngaran mani saraosna Bi?”
“Teu sawios-wios Um Bambang, teu sawios-wios.”
“Saha Um Bambang téh?”
“Sumuhun ieu nu nyebaktkeun ganti ngaran mani saraosna.?
“Hahahahaaa…ieu mah lain Um Bambang Kang, Bah Adun.”
“Tuh geus awon deui wé nami téh, Adun. Potongan bapa modél kieu mah, dada sembada, kumis kandel, dangong maco, namina kedah Um Bambang.”
“Kumaha Bah?”
“Asa enya Sép euy!”
“Tos tong répot-répot. Si Bibi gentos nami janten Tanteu Véra, si Abah janten Um Bambang. Kumargi abdi nu masihan namina tur sangkan barokah, pergantian nami téh aya saratna.”
“Aya saratna Kang?”
“Sumuhun aya saratna da sagala rupi ogé teu disaratan mah moal jadi. Sapertos jalmi hoyong gaduh budak saratna nya awéwé kudu kawin ka lalaki, atuh lalaki kudu kawin ka istri.”
“Ah ayeuna mah aya lalaki kawin ka lalaki awéwé kawin jeung awéwé.”
“Éta mah nu gélo, teu cageur uteukna. Puguh-puguh nyambel téh mutu jeung coét. Ningan coét nangkarak, mutu nutug terus diasoy-asoy……..jadi wéh budak,éh sambel. Ari mutu diadu-adu jeung mutu, coét diadu-adu jeung coét mah rék jaben kumaha nyieun sambel? Nu matak payus mun nu kitu peta disebut gélo gé da teu waras uteukna. Da lamun waras mah meureun nurut kana pituduh hukum Gusti, lain nurut kana pituduh napsu. Leres teu sodarah-sodarah……?”
“Pinter euy si Akang!”
“Akang téaaa…..lain tukang dagang balon samanéa, tapi balon wancahan tina bakal calon.”
“Wéy, hébat. Bakal calon naon?”
“Na teu arapal? Pan di Kabupaten Bandung téh taun 2020 rék hajat gedé nyaéta pilkada aias pemilihan kepala daérah, bupati sareng wakilna. Tah ayeuna téh keur usum nyalonkeun atawa ngabalon. Akang ogé badé ngiringan nu mawi ngapruk ka lembur datang ka désa taya kajabi nuju sosialisasi pencalonan.”
“Kutan téh?”
“Sumuhun.”
“Ngiring atanapi daptar ka partéy mana?”
“Tah lebah dieu mah Akang bingung.”
“Bingung ku naon?”
“Bingung kumaha maraban anak jeung pamajikan sedengkeun balon can payu hiji-hiji acan. Ku kituna moal lami, marangga ka sadayana…….”
“Haaaar….itu geura?”
“Kieu meureunan, Bah.”
“Heueuh Sép, kurang saeundan. Tapi ari info ngeunaan rék pilkada jeung ayeuna keur usum bakal calon atawa balon bupati/wabup Bandung mah da bener, barudak.”
“Tah  keur nyanyi lagamna mah lagam Balonku Ada lima tapi rumpakana diséléwéngkeun, dasar si gejul.”
“Bener Sép!”
“Enya Jin.”
“Istriku ada hiji, rupa-rupa kentutnya, kentut jengkol meleber, bau mabek dan pahang. Meledak kentut istri, dut, wajahku hancur lebur…..!”
“Hahahahaaa…….” (lajengkeuneun) **

Komentar

Tinggalkan Balasan

Alamat email Anda tidak akan dipublikasikan. Ruas yang wajib ditandai *

Lewat ke baris perkakas