Kaduhung (1)

Rékacipta Féndy Sy Citrawarga

 

“ALAH aya Jang Yaya, damang, Jang?”
“Hamdallah, Bah. Daramang sadayana?”
“Cageur, Ya.”
“Horéam uing mah ah.”
“Naha horéam, Jin?”
“Ngomongna si Yaya mah sarwa ‘a’, rupa-rupa pisan. Na teu bisa ngomong normal siga batur, Ya?”
“Kagak.”
“Naha?”
“Pan kahayang pangarangna sangkan Yaya tandang makalangan ngabamblamna sarwa ‘a’. Paham?”
“Hahaaa….tong ngambek atuh!”
“Kagak marah Yaya mah, ngan….”
“Ngan naon?”
“Ngan hayang nampar wajah Anda!”
“Anyiiir….galak, Darsép.”
“Kop tah Yaya, cabok wajah si Ujin!”
“Ah, siah Darsép!”
“Dibandungan téh ayeuna–ayeuna siga loba nu kaduhung nya Bah?”
“Naon téa, Sép?”
“Sumuhun sagala rupi wé, nu sidik abdi mah kaduhung lalajo Pérsib basa  ngayonan Bali United nu kawon 2-3 téa basa dinten Kemis ping 28 Nopémber kamari ieu.”
“Sarua wé uing gé kaduhung, Dasép.”
“Yaya nya sama sajah ngarasa hanjakal, Akang-akang. Bayangkan saja, awal-awal balad bal-balan asal Jawa Barat dapat angka…”
“Na teu bisa nyebut Persib, Ya? Maké disebut balad bal-balan asal Jawa Barat?”
“Dapat Kang, Parsab!”
“Hahaaaaa…..enya keun waé Ya sok kumaha dinya daripada leuwih ruksak, moal enya Persib jadi Parsab. Tong digeureuh-geureuh Jin lah!”
“Enya kuma manéh Ya, dipaksa-paksa mah ngaran Asép jadi Asap.”
“Ah, siah Surjin.”
“Kaduhung pédah éléh nya sép, Jin?”
“Sumuhun éta Bah da cacak pami kénging mah tangtos moal kaduhung.”
“Normal, Sép!”
“Normal kumaha ari Abah?”
“Ari kitu, Jin?”
“Normal mah moal ngasupkeun bal kana gul sorangan.”
“Oh, gul Supardi, Jin?”
“Sumuhun, Bah.”
“Apan geus katingali harita kénéh gé Supardi tangka gogodeg, ngahuleng ngaraga meneng. Tatéh tandana kaduhung!”
“Leres Bah, diangken ku Bang Pardi gé kaduhung cenah, tapi da teu dihaja.”
“Kitu Darsép?”
“Enya Jin.”
“Pan dibéla ku Pa Haji Umuh ogé, para bobotoh tong  nganaha-naha komo nyeceléh Supardi da teu dihaja.”
“Kawasna mah basa bal nyangsang na mastaka Kang Par, Kang Par nyangka yang ngajaga gawangna Wawan, padahal mah……”
“Padahal saha Yaya?”
“Masa Akang kagak apal yang ngajaga lawang gawang balad bal-balan asal Jawa Barat?”
“Nya apal.”
“Saha?”
“I Made Wirawan.”
“Mantap Kang. Tah Bang Par basa bal kana mastakana nyangka yang ngajaga gawangna Wawan, padahal mah Rawan….”
“Hahaaaaa……,” sareuri
“Nu matak ceuk Abah gé lalajo Pérsib mah kudu kuat méntal, ulah dibiasakeun atoh duméh geus ngasupkeun gol ari can enggeusan maén mah.”
“Naon resepna sih alajo méngbal?”
“Jih, Bi Rahi mah nya resep atuh bal hiji diparebutkeun, terus pada moro paheula-heula ngasupkeun!”
“Kateuteuari! Geus asup dibijilkeun deui.”
“Nya enya atuh moal enya terus sina nyirekem.”
“Puguh éta nu pelem mah, dikeueum.”
“Hahaaaaaa..naon nu dikeueum téh, Bi?”
“Seuseuheun Ujin ngarah gampang nyeuseuhna!”
“Hahaaaa…..sugan téh bal.”
“Mungguhing hirup aya nu ngatur barudak. Nu kudu asup teu asup, nu ulah asup malah asup.”
“Maksadna, Bah?”
“Enya Supardi pada nyarékan ku bobotoh pédah hayoh ngasupkeun gul ka gawang sorangan. Ari Ezechiel nu dihayoh-hayoh bisa ngasupkeun bal nalika tajongan pinalti, ngadon teu abus, atuh pada nyarékan deui waé.”
“Leres Bah pastina kaduhungeun Ezechiel gé.”
“Nya pasti atuh Sép, liang gul sakitu gorowahna, dijaga ukur ku saurang, tajongan tangka teu asup.”
“Siga si Bah Iri, apan dicarékan béak karep ku pamajikanana nu ngora.”
“Naha Darsép?”
“Teu bisa ngasupkeun, Jin, da parabotna geus teu walakaya.”
“Alah siah, kumaha atuh?”
“Bati ngawiwiw ceurik, Jin. Pajah téh:
Aya sihung aya sihung,
sihung maung dina baki.
Kaduhung ieung kaduhung,
dicandung ku aki-aki.”
“Hahahaha…..!” (lajengkeuneun) **

Komentar

Tinggalkan Balasan

Alamat email Anda tidak akan dipublikasikan. Ruas yang wajib ditandai *

Lewat ke baris perkakas