Kaduhung (3)

Rékacipta Féndy Sy Citrawarga

“ARI sugan SÉ jeung SK nu didarémo ku para buruh, horéng si Émén jeung si Kodir nyah Darsép?”
“Enya Jin.”
“Lain naha si Imas embungeun ka si Émén?”
“Apan hayangeun ka si Kodir.”
“Apan cenah ka si Kodir gé embungeun.”
“Apan heueuh hayangeun ka uing. Jadi uing nu meunang mah.”
“Enya, tapi  si Imas bakal kaduhung.”
“Bener Jin, bener malah manéhna geus pok pisan ka uing kaduhung cenah.”
“Tuh…pan. Kaduhung ku naon cenah?”
“Kaduhung teu ti baréto cenah Jin.”
“Ah, siah. Kahayang!”
“Ya, naha kalah  ngahunted lain ngabamblam ka dinyah!”
“Wah da Akang-akangna harak ngabamblamna kagak ngajakan sayah.”
“Enya pan ayeuna diajakan. Sok rék nyarita naon?”
“Ngabamblam apa nya? Ya, ngabamblam kata warta aya mamah-mamah ngadakwa alatan anakna kagak makalangan na acara apa nya, katanya mah alatan kagak parawan.”
“Oooh…enya Jin. Dina SEA Games nu ayeuna keur lumangsung di Filipina cenah aya atlet senam nu sina balik deui alatan geus teu parawan.”
“Nyata, Kang, nyata. Saya kabawa nalangsa, Kang. Masa gara-gara kagak parawan batal makalangan?”
“Enya bener Sép, Jin, Abah gé maca beritana.”
“Kumaha éta téh Bah?”
“Ari nu kabaca mah enya ramé beritana kitu, tapi dibantah cenah lain duméh teu parawan alesan atlét sina mulang téh tapi éstuning alatan préstasi si atlét anu teu nyugemakeun palatihna.”
“Oooh..kitu nyah?”
“Enya. Dasar jelema sok hayang ngaleuwihan nanaon téh, sadeupa jadi dua deupa, jadi ramé wéh.”
“Kitu da lalaki mah ka awéwé hayangna nu parawan bari manéhna urut éntog urut hayam!”
“Éta mah lagu Doel Sumbang atuh Bi!”
“Enya ceuk saha lagu manéh Ujin?”
“Hahahaaa…..”
“Geus lah mending tatarucingan ayeuna mah.”
“Tarucing naon Darsép?”
“Naon bédana awéwé jeung Persib?”
“Nya béda atuh Darsép. Persib mah kleub sépak bola ari awéwé mah jelema.”
“Lain!”
“Abah?”
“Pokona mah béda wéh Sép moal disebutkeun hiji-hijina da loba!”
“Bi Rahi?”
“Teuing ah teu nyararaho.”
“Yaya?”
“Kagak apal sayah mah apalna kana makanan bahwa sarapan sama bala-bala panas sangat nyaman.”
“Kana dahareun waé manéh mah Ya!”
“Ya lah da jalma tanpa barangdahar mah bakal gancang wapat. Wapatna mawa amal hasanah nya bagja lantaran bakal nganjang ka sawarga. Narajang mawa amal gaplah lantaran amalna sarat paharaman, nya ka naraka. Bahaya!”
“Wah nyaan mantap dakwahna, Ya!”
“Nyata, Kang da Yaya mah banyak maca bab agama.”
“Alus Ya. Kudu kitu jadi budak ngora mah ngarah jaga geus kolot boga bekel hirup nu alus.”
“Hamdallah, Bah!”
“Ari ceuk manéh naon bédana Persib jeung awéwé, Darsép?”
“Bedo iyeu téh?”
“Bedooooooo…..!” saur manuk.
“Bédana awéwé jeung Persib, ari awéwé mah embung jadi parawan saumur-umur, ari Persib mah hayang jadi parawan saumur-umur.”
“Bener ogé Darsép. Tapi dina kanyataanana mah jebol deui-jebol deui. Peuting tadi ku Perséla dua – enol. “
“Enya Jin. Torojol deui gul bunuh diri, Jufriyanto!”
“Kaduhung deui kaduhung deui, nya!”
“Kaduhung lalajo Persib Ujin?”
“Kauhung ngadahar sendal capit, sing demi teu ngeunah!”
“Hahaaaa….!” (lajengkeuneun) **

Komentar

Tinggalkan Balasan

Alamat email Anda tidak akan dipublikasikan. Ruas yang wajib ditandai *

Lewat ke baris perkakas