New Normal (1)

Jangan Lupa Bagikan
Rekacipta Fendy Sy Citrawarga

 

“DAMANG, Bah?”
“Alhamdulillah, Jin. Pidua ti saréréa.”
“Nuhun damang mah Bah. Naon deui modal hirup nu utama mah iwal ti cageur, sehat, atawa walagri.”
“Tah éta Jin.”
“Ari uing moal ditanya cageur henteuna, Surjin?”
“Nu matak teu ditanyakeun gé geus katingali cageur, Darsép, da mun gering mah meureun moal ka dieu manéh téh.”
“Nya atuh basa-basi wé jeung babaturan.”
“Nya teu nanaon hayang basa-basi mah. Ngan masalahna tina basa-basi téh rék terus jajan baso atawa moal, Darsép?”
“Moal, Surjin, Paling gé ditakol beusi!”
“Hahaha……!”
“Dupi Bi Rahi damang?”
“Berekah Ujin, ari awak mah cageur. Ngan domptét mah keur gering duanana gé.”
“Haaar….naha mani loba-oba teuing dompét, dompét nu mana nu gering Bi?”
“Duanana ceuk Bibi gé.”
“Sumuhun dompét paragi naon waé mani boga dua?”
“Angger si Ujin mah kudu jéntré waé. Nu hiji dompét paragi diasupan duit, nu hiji deui mah dompét paragi diusapan terus diuseupan…..”
“Hahahaaa…..!”
“Atos Bi ah. Lalawora tah nyarios téh.”
“Pan ayeuna mah geus jaman new normal, Ujin. Hiburan, ulah nguluwut teuing siga ka tukang-tukang nya Bah?”
“Enya Bi. Pamaréntah urang, sanajan korona batan nyingkah kalah nambah kasusna, geus ngararancang keur nyanghareupan hirup new normal alias normal baru atawa anyar.”
“Nambihan deui Bah?”
“Enya Sép. Tepi ka poé Ahad tanggal 31 Mei kamari téh kasusna geus ngahontal angka 26.473, nu maotna aya 1.613 urang, demi nu cageurna aya 7.308 urang.”
“Innalillaahi….kilang kitu atuh rék di-new normal nya Bah?”
“Enya Bi. Dalah dikumaha atuh meureunan da kudu arusaha, barudak kudu sarakola.”
“Atuh panginten pagilinggisik deui alias pacaraket, tempat-tempat umum baris didareugdeug. Na moal kalah beuki nambihan kasus koronana, Bah?”
“Ceuk ujaring béja mah pamaréntah geus nyiapkeun aturan, Jin, boh keur di imah, keur di tempat pagawéan, keur di tempat umum siga mol, boh keur di tempat ibadah, jeung sajabana.”
“Janten angger wé diatur nya Bah? Atuh sanés gé normal ari diatur-atur kénéh mah?”
“Jéh apan heueuh koronana nyaliara kénéh, Jin. Da mun bener-bener geus aman mah moal aya aturan itu ieu deui pastina gé. Nu matak iwal ti kudu ati-ati wé urangna najan geus new normal gé. Nu penting mah urang sararéhat wé barudak.”
“Leres Bah da tos teu damang mah siga Mang Gihan apan dahar gé béak lima piring.”
“Rewog atuh satéh Darsép gering dahar béak lima piring mah!”
“Puguh teu asup cai-cai acan Jin.”
“Ongkoh béak lima piring, ongkoh teu asup cai-cai acan. Kumaha ari manéh Darsép?
“Heueuh bakating aral ku kasakit teu bisa dahar sangu Jin, antukna Mang Gihan napsu, belewer-belewer piring salima-lima dibalédogkeun kana témbok nepi ka pareupeus.”
“Hahaaaa…..” (lajengkeuneun) **

Tinggalkan Balasan

Alamat email Anda tidak akan dipublikasikan. Ruas yang wajib ditandai *

Next Post

Jokowi: Situasi Sulit Masih akan Dihadapi, Perlu Daya Juang untuk Melewati

Sen Jun 1 , 2020
Jangan Lupa BagikanVISI.NEWS – Presiden Joko Widodo atau Jokowi mengatakan, situasi sulit akibat dampak pandemi Covid-19 masih akan dihadapi bangsa ke depan. Maka dari itu, perlu daya juang untuk melewati masa sulit tersebut. Hal itu dikatakannya saat pidato dalam upacara peringatan Hari Lahir Pancasila di Ruang Garuda Istana Kepresidenan, Bogor, Jawa Barat, Senin […]