Tragédi Mahugi (1)

Jangan Lupa Bagikan

Rékacipta Féndy Sy Citrawarga

 

“AYEUNA téh poé Senén, aya kutu dina baki. Mun urang loba ngahénén, nya tangtu saeutik rijki.”
“Beu, éta si Diran geus ngararisan sisindiran tanpa paidin.”
“Idin ti saja Ujin?”
“Nya idin ti uing atuh Darsép pan sasari gé sok uing heula nu ngabalakan ngomong mah.”
“Keun baé atuh Jin hayangeun meureunan da ningan sisindiranana gé mani alus kitu. Manéh mah tanawuruh bisa.”
“Maké teu bisa Darsép. Déngékeun ku ceuli tong ku irung.”
“Hahaaa….”
“Enya sok ari bisa mah.”
“Ayeuna téh poé Senén, isukan poé Salasa. Isukna deui poé Rebo, tas Rebo nya Kemis, tas Kemis nya Jumaah, tas Jumaah……..”
“Kudu dicaok!”
“Hahaa……”
“Sugan téh heueuh bisa. Kilang kitu si Diran ulah miheulaan ngomong. Cik Diran teruskeun sisindiran si Kang Ujin. Ayeuna téh poé Senén, isukan poé Salasa cenah.”
“Siap Kang Asép. Ayeuna téh poé Senén, isukan poé Salasa. Si bapa teu eureun nenén, da cenah mani mirasa.”
“Haaaa………!”
“Si Diran gélo! Sugan téh moal ka dinya cigna!”
“Tapi bener ceuk sisindiran si Diran tadi barudak, mun urang loba ngahénén nya tangtu saeutik rijki.”
“Kitu Bah?”
“Enya atuh Jin. Komo ilaing para nonoman jaman now kudu binangkit, mandiri, ulah gumantung ka kolot komo ka batur.”
“Nyaéta horéam Bah.”
“Horéam kumaha Jin?”
“Horéam da tos kénging rijki, sumuhun artos, teras dibikeunan deui ka batur. Ka warung, ka si Dédi, ka ema, malah dipahugikeun ka si Mimin. Teu kaur numpuk duit téh, meunang bayaran kaluarkeun deui.”
“Nurustunjung Ujin!”
“Nurustunjung kumaha Bi?”
“Nya nurustunjung embung mahugi ka kabogoh, ari dibogohan hayang, ku batur ulah!”
“Tuda mahugi téh ti lalaki ka awéwé waé, cik atuh balikkeun nu mahugi téh awéwé ka lalaki.”
“Hahaaa…….!”
“Tuh nya beuki sidik nurustunjungna téh si Ujin mah. Yeuh di mamana gé lalaki nu méré ka awéwé, mahugi téa ngaranna. Mahugina kudu barang alus, ulah siga manéh.”
“Na uing kumaha kitu?”
“Heueuh ceuk si Mimin manéh mahugi si Mimin ngajajanan baso dianjuk, jaba ngilu ngasaan.”
“Hahaaa…….”
“Kedah dikumahakeun Bah mahluk modél kieu?”
“Antep wé Bi. Ngan bener ceuk Bibi barang béré ka batur téh kudu nu alus nu dipikacinta ngarah sugemaeun nu dibéréna.”
“Kitu Bah?”
“Enya barudak. Tah ayeuna téh bulan Haji, bulan Zulhijjah, usum meuncit nyaéta korban atawa kurban, ceuk basa Arabna qurban.”
“Aéh muhun nya dinten Jumaah payun téh Lebaran Haji usum meuncit deui.”
“Enya Jin. Tah salah sahiji sarat korban téh nya kudu barang nu alus, nu dipikacinta. Urang mah kadar domba, Nabi Ibrohim mah apan kedah meuncit putrana…”
“Leres Bah.”
“Tah manéh gé Jin pan aya nu dipicinta lin?”
“Nya aya Darsép, si Mimin nu ku uing kacida dipicintana mah.”
“Heueuh éta téh kudu dikorbankeun.”
“Korban kumaha Darsép?”
“Nya korban mah dipeuncit atuh Surjin.”
“Hahaaaa……” (lajengkeuneun). **

One thought on “Tragédi Mahugi (1)

Tinggalkan Balasan

Alamat email Anda tidak akan dipublikasikan. Ruas yang wajib ditandai *

Next Post

Keluarga Yodi Belum Terima Hasil Penyelidikan Polisi

Sen Jul 27 , 2020
Jangan Lupa BagikanVISI.NEWS- Pihak kepolisian telah mengungkap teka-teki tewasnya editor Metro TV almarhum Yodi Prabowo. Yodi dinyatakan bunuh diri menggunakan pisau yang dibelinya sendiri sebelum kejadian. Namun begitu, keluarga Yodi masih belum bisa menerima hasil penyelidikan polisi. Dikatakan, banyak sejumlah kejanggalan yang masih menjadi misteri di balik tewasnya almarhum. Apalagi […]