Aspal (2)

Editor :


Silahkan bagikan

Rékacipta Féndy Sy Citrawarga

 

“MANI teu kira-kira si Bi Rahi mah, ih!”
“Teu kira-kira kumaha, Ujin?”
“Éta rék nyium uing ku bedog, atuh meureun songhék.”
“Hahahaaa…..”
“Embung nyah dicium ku biwir bedog, Ujin?”
“Nya embung atuh da nyeri.”
“Nya teu nanaon ari embung dicium ku biwir bedog mah, yeuh gantian ku biwir………”
“Kampak, meujeuhna lah, jeding-jeding ka dinyah.”
“Hahahaaa…..”
“Darsép gélo, kalah beuki ruksak!”
“Janten kumaha atuh Bah jalmi jaman ayeuna seueur nu aspal alias asli tapi palsu téh?”
“Nya teu kumaha Jin, iwal ti urang mah ulah nurutan, kaduana sing waspada bisi katipu ku jalma aspal.”
“Maksadna Bah?”
“Heueuh urang mah ulah nurutan jelema palsu. Contona nganyerikeun batur, nandasa jalma teu tuah teu dosa. Tah nu kitu téh jelema palsu sabab paripolahna teu béda jeung sato da jelema asli mah boga rarasaan, boga papagon hirup. Kikituan sangeunahna taya ikatan pertikahan, éta tandana jelema palsu, ari wujudna asli jelema ari paripolahna lain jelema nu kitu ngaranna palsu!”
“Leres Bah, dipesék mah tinggoréhél nu aspal téh nya.”
“Puguh wé Jin. Angot ngoréhan aspal batur mah gampang pisan, nu hésé mah ngoréhan kapalsuan diri sorangan.”
“Tah si Darsép nu kitu mah Bah.”
“Sarua si Ujin gé kétang Bah.”
“Geus tong silih tuding. Tah ayeuna rék pilkada nu kari menghitung hari, kadé milih pamingpin téh bisi pamingpin aspal.”
“Ah moal atuh Bah.”
“Naha ilaing boga kayakinan moal, Jin?”
“Apan nalika kampanye mani aralus, dina debat taya céda, piraku wé aspal, Bah!”
“Nya heug ari boga pamadegan kitu mah alus. Ngan lamun ceuk ilaing aralus kabéh
rék milih nu mana?”
“Haduh, enya nya. Jadi bingung rék milih nu mana da aralus kabéh. Nomer hiji alus, nomer dua alus, nomer tilu alus. Ngarah teu bingung mah rék nomer opat wé….ah.”
“Hahahaaa…….!”
“Nya teu kaci atuh seblu.”
“Tuda bingung Darsép satéh. Kampanyena aralus kabéh. Ceuk kahayang téh heug aya saurang mah nu kampanye, pilih sayah! Lamun kapilih jadi bupati sayah rék korupsi. Meureun ku uing moal dipilih.”
“Hahahaaa…”
“Pokona mah sing waspada kadé milih nu aspal. Sabab pamingpin aspal mah teu béda jeung aspal jalan, pada ngidek, padangagéléng, kalan-kalan padanyiduhan jeung padangiihan.”
“Leres wé nya Bah?”
“Puguh wé Jin. Pamingpin asli mah siga langit, padaningali, padanyuhun, padangahormat. Sok Ilaing mun pabeubeurang tanggah ka langit pan kudu baé ngangkat leungeun nutupan panon da sérab. Naon sababna langit padanyuhun pada ngahormat? Sabab gedé jasana, nangtayungan jeung nalingakeun ka sakumna mahluk, nu beunghar, nu miskin, ngarasakeun mangpaatna langit.”
“Jero, Bah.”
“Lain jero-jero Ujin heug mikir!”
“Enya lah Bi. Ké, Bah saur Abah langit mah nalingakeun sakumna mahluk maksdna?”
“Maksudna Jin, ber ka mana ber ka mana gé mahluk di alam dunya pasti kapanggih ku langit. Sok wé ilaing ulin ka Sukabumi aya euweuh langit?”
“Nya aya atuh Bah.”
“Nya éta kitu, sugan kacaritakeun aya urang Bandung nyaba ka Sumedang terus nyarita, di Sumedang mah euweuh langit aya ogé tahu.”
“Hahahaaa……”
“Tah pamingpin asli jelema mah kudu siga langit, ka rahayat sakabéh nalingakeun. Ulah ieu mah nu ditalingakeun téh rahayat sa-dapil anu, sapartéy anu, ari béda dapil béda partéy mah diantepkeun. Tah éta pamingin aspal nu matak nganyerikeun haté rahayat.”
“Siap Bah lah.”
“Da leres atuh Bah, Bibi gé nyeri jadi korban jalmi aspal téh.”
“Na kumaha kitu Bi?”
“Heueuh Ujin, ari sugan nu didadahan, nu dipelong teu ngiceup-ngiceup, malah disun sayang téh si ganteng kalem Afgan asli.”
“Ari pék?”
“Ukur gambar. Baning unggal peuting diciuman nepi ka rangsak.”
“Hahahaaa……(réngsé) **

M Purnama Alam

Tinggalkan Balasan

Alamat email Anda tidak akan dipublikasikan. Ruas yang wajib ditandai *

Next Post

Satker Pengguna Anggaran Supaya Gunakan DIPA untuk Percepat Pulihkan Ekonomi

Sen Nov 30 , 2020
Silahkan bagikanVISI.NEWS – Menjelang tahun anggaran 2021 yang tinggal sebulan lagi, satuan kerja (Satker) vertikal sebagai kuasa pengguna anggaran (KPA) di daerah sudah bisa melakukan proses lelang, penunjukan, atau belanja dengan dana APBN yang akan dilaksanakan selama 2021. Dengan begitu, pada awal tahun anggaran 2021 mendatang, sudah dapat dilaksanakan penandatanganan […]