Muhé (5)

Jangan Lupa Bagikan

Rekacipta Fendy Sy Citrawarga

 

“BANGÉNAN kana lauk naon eupan cangcut, Bi?”
“Nya rupa-rupa wé Ujin ceuk tukang nguseup mah, ngan nu pangdohot-dohotna mah lauk hidung belang.”
“Hahaa…..”
“Nu kumaha lauk hidung belang téh, Bi?”
“Si Ujin mani talété, nya!”
“His, nya enya kudu talété sangkan jelas, bisi hoak.”
“Lauk hidung belang téh Ujin, ilaing!”
“Hahaaa…….”
“Tah kitu ari loba tatanya téh Ujin, sok malik ka sorangan.”
“Ah siah Darsép. Sok buru terangkeun naon muhé téh?”
“Biasa gé sok engké rék namatkeun carita Ujin, bet ditanyakeun ayeuna?”
“Ah siah bonganna sok rupa-rupa alesan, lain si Mimin téa, waktosna séép téa. Nu matak mending ditanyakeun ayeuna nya Bah?”
“Kuma maranéh wé Jin, ah. Nu sidik tepi ka poé Kemis tanggal 14 Mei kamari kasus korona geus ngahontal angka 16.006, nu maotna1.043, nu cageurna 3.518.”
“Gustiiii….kalah nambihan janten 16.006, sanés ngirangan nya Bah.”
“Enya Bi, namabahan lima ratusan kasus ti poé saméméhna.”
“Kilang kitu cenah PSBB dikendoran, mudik kénging, didamel deui kénging keur nu yuswa 45 taun ka handap nya Bah.”
“Enya Sép, lebah dinyana mah rada lieur ngabandungan ketak pamaréntah téh. Tapi da meureunan geus meunang nimbang-nimbang pamaréntah ogé, piraku rék nyangsarakeun rahayatna.”
“Nya mudah-mudahan mah kitu Bah. Nu matak abdi mah badé muhé wé lebaran taun ayeuna mah.”
“Éta si Darsép, geus pok deui pok deui muhé. Naon muhé téh?”
“Na can nyaho kénéh waé, Ujin?”
“Nya henteu da can diterangkeun satéh Darsép!”
“Tah si Diran nyahoeun geura, naon muhé téh Ran?”
“Ceu Uhé dicalana jin, teu pupuguh ngajak saré. Muhé téh yeuh Kang Ujin, Pa Umuh kumisna saé.”
“Hahaa……”
“Mamawa Pa Umuh sagala ari manéh Diran!”
“Sonoeun ka Persib tatéh Jin geus lila teu lalajo Pesib maén heug keur aalusna, pijawaraeun.”
“Tangtos Bah. Nu matak sangkan énggal-énggal nongton Persib deui, sangkan ngala rejeki lancar deui, sangkan barudak sarakola deui, sangkan mahasiswa ngampus deui, saéna mah mayunan lebaran téh muhé waé.”
“Heueuh naon muhé téh Darsép? Hantem wé nyebut muhé, diterangkeun henteu!”
“Muhé téh yeuh Ujin, tah tanyakeun ka si Yaya.Pasti nyahoeun.”
“Tanyakeu wé ku manéh Darsép!”
“Naon cenah Ya, muhé téh sok terangkeun bisi si Ujin ceurik, heug batal kéh puasana!”
“Heueuh da ceurik bari nyirop nyah Darsép!”
“Hahaha…..”
“Sanyatana Yaya palay wakca satarabasna kana hal yang Kang Asap tanyakan pada sayah. Hanya, maap-maap saja takkan Yaya katakan. Sabab…….”
“Sabab teu dibayar nyah? Geus moal ka mana léokna lah.”
“Kagak salah, matakna, mana bayaranana?”
“Hahaaa….”
“Muhé téh Ujin mudik hémat.”
“Maksudna Darsép?”
“Enya da ayeuna mah keur usum korona kénéh ilaing ulah musik.”
“Musik Darsép?
“Enya ulah musik, muru Tasik.”
“Kudu ka mana atuh?”
“Mending murah sorangan.”
“Maksudna?”
“Muru imah sorangan, dijamin muhé banget…..”
“Hahaaaa……” (réngsé) **

Tinggalkan Balasan

Alamat email Anda tidak akan dipublikasikan. Ruas yang wajib ditandai *

Next Post

Tinggalkan Saudi, 91 Warga Indonesia Pulang ke Tanah Air Ikuti Program Awdah Initiative

Ming Mei 17 , 2020
Jangan Lupa BagikanVISI.NEWS – Mengikuti program Inisiatif Awdah (Kembali), Kerajaan Arab Saudi, sebanyak 91 orang warga negara Indonesia kembali ke Jakarta pada Minggu (91/5/2020). Para penumpang berangkat menuju ibukota Indonesia dengan menggunakan pesawat khusus dari Bandara Internasional King Khalid setelah menyelesaikan semua persyaratan yang ditetapkan Departemen Paspor (Jawazat). Awdah Initiative memungkinkan […]