Rékacipta Féndy Sy Citrawarga

“TEU kira-kira manéh mah Diran!”
“Naon téa, Ujin?”
“Éta ningan kamari Darsép, ceuk Si Diran, ka Banjaran ka Cililin, tikerelep nyeri hulu. Nya Diran mah yeuh Kang Ujin, sok resep néangan palu.”
“Ceuk uing, keur naon palu, Diran?”
“Ceuk si Diran, ka Panjalu ngadon ulin, aya kohkol lebah cukang. Nya palu mah yeuh Kang Ujin, keur nakol mastaka Akang.”
“Hahahaaa……!”
“Nya keun waé atuh Jin sirah ditakol palu mah paling gé nongnong.”
“Hahaa…..!”
“Heueuh da hulu uing téh paku, takoleun palu, Darsép! Takol mah sirah ilaing Diran.”
“Aya bambung dina tajin, nya embung atuh Kang Ujin.”
“Naha maké embung Diran?”
“Aya sireum na sapédah, sok sieun paluna beulah.”
“Hahaaa…..”
“Minggeus siah Diran, ka mana karep wé ah. Janten néangan téh pokona hirup nya Bah?”
“Tah kitu Jin. Nu matak ku Gusti unggal mahluk boh manusa boh sato héwan dibekelan alat keur néangan.”
“Nu disébat indra téa sanés Bah?”
“Batara Indra téa Darsép?”
“Éta mah wayang atuh Ujin. Indra séjén deui ieu mah Ujin, nya Bah?”
“Eya Sép indra mangrupa ciptaan Gusti nu kacida diperelukeunana ku urang-urang atawa sato héwan ogé. Geuning sok aya sesebutan panca indra.”
“Oh éta Bah?”
“Enya Jin. Indra atawa indria panempo, pangdéngé, pangrasa, pangambeu, jeung paragi nyabak.”
“Leres Bah.”
“Indra panempo, Jin?”
“Soca atuh Bah moal enya tuur.”
“Bener. Indra pangdéngé?”
“Cepil atuh Bah moal enya siku.”
“Bener. Indra pangrasa atawa paragi ngasaan, Jin?”
“Naon nya? Naon cenah Ya alat paragi ngasaan?”
“Alat pangrasa mah Kang Ajan barayana baham.”
“Saha baraya baham téh Sarya?”
“Létah meureunan nya Ya?”
“Mantap, Abah mantap.”
“Mani teu bisa nyebut létah-létah acan Sarya. Sok sebutkeun létah kituh ké dibéré duit.”
“Létah!”
“Éta geuning bisa nyebut létah Sarya?”
“Da aya pamayarna. Mana alat pamayarna?”
“Cokot di Bagdad, Sarya!”
“Haram jadah, Kang Ajan haram jadah, jadah haram, ngakaya manah Yaya taya ras-rasan. Awas, awas, awas, Yaya mah takkan asa-asa, nyaan!”
“Moal asa-asa naon Sarya?”
“Takkan asa-asa ngadahar martabak sabalad-balad, kawas bala-bala, bakakak, salak, samangka, dan sajabana, saat padaharan Yaya lapar.”
“Hahaha….heueuh alus sugan téh takkan asa-asa nandasa Kang Ujin, Ya.”
“Tah sabada ngadahar martabak sabalad-balad, kakara bakal nandasa Kang Ajan.”
“Hahaaa…..”
“Alus Ya lah tuman teuing. “
“Ah siah Darsép.”
“Ku naon nadasana Ya?”
“Parang, Kang.”
“Parang nyangsang kana tarangna nya Ya?”
“Parangkul-rangkul sama parawan anakna tatangga, Kang!”
“Hahaaa……” (lajengkeuneun) **