Néangan (4)

Silahkan bagikan

Rékacipta Féndy Sy Citrawarga

 

“NU euweuh téh naon Darsép?”
“Naon téa Jin?”
“Heueuh pan ceuk manéh kamari, da teu kabéh nu néangan cilaka tapi salamet atawa untung atuh Ujin. Lolobana mah nu néangan cilaka, buahna nya cilaka siga si Komod.”
“Ceuk uing, si Komod Darsép?”
“Enya Jin, ceuk manéh téh. Si Komod néangan cilaka meunang cilaka.”
“Kumaha lalakonna? Tanya uing.”
“Ceuk manéh, siap Jinlah ngan isukan wé nya ayeuna mah uingna rék néangan heula….”
“Uing nanya deui, néangan naon Darsép?”
“Ceuk manéh, néangan nu euweuh da nu aya mah teu kudu ditétéangan!”
“Hahahaaa……”
“Tah sok ayeuna jelaskeun naon nu euweuh téh Darsép?”
“Nyaéta Jin bingung euy. Disebut euweuh da aya disebut aya da euweuh.”
“Haaar… itu geura, teu puguh ongkoh euweuh ongkoh aya. Naon nu disebut euweuh tapi aya téh Darsép?”
“Tah si Diran gé nyahoeun. Naon Ran anu euweuh tapi aya?”
“Di landeuh aya buaya, dahar putu ni samutut. Anu euweuh tapi aya, geus tangtu éta mah hitut.”
“Hahaaa…..”
“Naha Diran?”
“Dagang tutut ka Cikeumeuh, dibeulina ku Kang Yaya. Pan hitut jirimna euweuh, bauna mah sidik aya.”
“Hahaaaa…..”
“Bener ogé Diran, jirimna mah euweuh tapi bauna mah aya, jol peledek wé nya.”
“Ceuk uing gé kitu tah Jin.”
“Heueuh bener euy Darsép.”
“Nu matak kudu ati-ati gé barudak.”
“Kedah ati-ati kumaha Bah?”
“Heueuh sangkan teu cilaka gara-gara nu euweuh tapi aya siga hitut. Sangkan teu cilaka katémbak hitut bau, nya liang irung kudu ditutupan.”
“Nya muhun atuh Bah, moal enya peledek hitut nu ditutupan liang cepil.”
“Hahaaa……”
“Nyaéta kitu Jin. Tah korona gé teu béda ti hitut, euweuh jirimna tapi aya bahayana nu matak keur nyegahna sangkan teu kakeunaan korona kudu cegah ku maké masker mun indit-inditan, jaga jarak, mindeng ngumbah leungeun nu disebut protokol kaséhatan téa.”
“Leres Bah.”
“Enya Jin.”
“Enya gé sarua korona jeung hitut, tapi leuwih misterieus korona batan hitut mah.”
“Na kumaha kitu Sép?”
“Nya muhun Bah. Leuheung hitut mah aya jirim sorana pan korona mah taya soraan pisan. Gara-gara hitut aya soraan Nyi Nonok mah apan kawiwirangan. Meureunan keuna kana kekecapan néangan salamet, tapi kalah cilaka.”
“Kitu Darsép? Si Komod mah néangan cilaka kalah cilaka ari Nyi Nonok mah néangan salamet kalah cilaka nyah?”
“Bener Jin. Si Komod geus pangseng hayang kawin, nya nyieun akal, manéhna jol blus wé asup ka kamar mandi Nyi Anih, budak parawan anak tatanggana nu keur bulucun da keur mandi. Jol gabrug wé si Komod nangkeup. Puguh wé Nyi Anih ngajerit. Diuruskeun tah di kantor RW.”
“Nanaonan ari manéh Komod asup ka kamar mandi batur? tanya RW.”
“Nuju néangan Pa RW, néangan ucing da sidik asup ka kamar mandi Nyi Anih. Tapi ningan teu aya, kalah aya Nyi Anih nuju ibak nya atos wé… biarlah ucing teu timu, asaaal…..”
“Asal beungeut sia bengep!” jebrod beungeut si Komod dihadiahan tonjok ku Mang Duyéh bapana Nyi Anih.”
“Hahahaaa……” (lajengkeuneun) **

Baca Juga :  Dianugerahi Parahita Ekapraya, Pemkab Bandung Perkuat 4 Driver PUG

M Purnama Alam

One thought on “Néangan (4)

Tinggalkan Balasan

Alamat email Anda tidak akan dipublikasikan.

Next Post

MUI Ajak Umat Perkuat Bidang Ekonomi

Rab Agu 26 , 2020
Silahkan bagikanVISI.NEWS – Sekjen MUI Buya Anwar Abbas mengajak umat bermusahabah terkait capaian umat di bidang ekonomi dalam menyambut Tahun Baru 1442 Hijriah. Dikatakannya, umat Islam memang sudah banyak sumbangsih bagi kemajuan bangsa. Namun, sumbangsih itu belum optimal menyentuh sisi ekonomi. Dari jumlah umat Islam di Indonesia yang mencapai 87%, […]