Tragédi Mahugi (2)

Jangan Lupa Bagikan

Rékacipta Féndy Sy Citrawarga

“GELUT Darsép!”
“Ah moal ramé gelut usum korona mah Ujin.”
“Moal ramé kumaha satéh Darsép?”
“Nya moal ramé jeung moal nyeri. Mun teu nyeri nya moal napsu, mun teu napsu nya moal segut.”
“Heueuh naha?”
“Pan kudu jaga jarak Surjin. Sok wé pikir rék nyeri kumaha nonjok saméter satengah keuna gé moal, hayang nonjok biwir, biwirna maké masker!”
“Hahaaa…….!”
“Darsép gejul!”
“Heueuh naon pasal atuh ngajak gelut ka uing téh Ujin?”
“Nya heueuh atuh satéh Darsép, pan ceuk manéh kamari, tah manéh gé Jin pan aya nu dipicinta lin?”
“Ceuk uing nya aya Darsép, si Mimin nu ku uing kacida dipicintana mah.”
“Ceuk manéh deui, heueuh éta téh kudu dikorbankeun.”
“Korban kumaha Darsép? tanya uing téh.”
“Ceuk manéh nya korban mah dipeuncit atuh Surjin.”
“Hahaaaa……”
“Ohhhh éta……hampura heureuy. Da leres nya Bah meuncit korban mah kedah nu dipicinta?”
“Enya bener Sép kitu pisan. Ceuk Abah gé urang-urang mah kadar domba atawa sapi, Nabi Ibrohim mah kedah meuncit putrana ku anjeun.”
“Kumaha tatéh Bah?”
“Kumaha naonna Jin?”
“Sumuhun cariosna?”
“Panjang ari kudu diguar mah Jin. Intina mah kieu. Hiji waktos Nabiyulloh Ibrohim ngimpén dipiwarang meuncit putrana ku anjeun nyaéta Ismail. Énjingna éta impénan téh didugikeun ka bojona Siti Hajar. Saur bojona seja ngiringan baé upami éta impénan téh sumpingna ti Alloh…..”
“Euleuh….kitu Bah?”
“Muhun Bi. Istri saléhah mah nurut ka carogé.”
“Mun Bibi mah salaki rék maéhan anak, rék dipiheulaan dikadék da….”
“Hahaa…..”
“Teu kitu Siti Hajar mah Bi. Sabab apal carogéna jalmi soléh sareng yakin sayakin-yakinna kana kinasih Alloh.”
“Teras Bah?”
“Nya terusna mah Jin, Nabi Ibrohim téh nepangan putrana Ismail nu harita keur sumedeng rumaja. Derekdek dicarioskeun perkawis impénan téa…..”
“Kumaha saurna Bah?”
“Teu bénten sareng ibuna, Nabi Ismail ogé nampi, barudak…..mangga Abah, mangga abdi geura peuncit sok asal éta leres piwarangan Alloh.”
“Dugi ka kitu pangorbanan jalmi soléh mah nya Bah, teu lebar sanaos kedah ngorbankeun nyawa, atuh angot ukur harta.”
“Enya kitu Jin, picontoeun urang saréréa yén micinta Alloh téh kudu enya-enya sangkan Anjeunna gé mikaasih ka urang. Kumaha wé urang micinta kabogoh apan ningan mani sok bro-boroan barang béré.”
“Da leres Bah, malah bakating ku bro-broan Mang Doyot mah meunang tragédi mahugi.”
“Alah siah, na enya nyah Darsép?”
“Bener Jin.”
“Sok atuh geura dongéngkeun.”
“Isukan wé Jin ayeuna mah uingna rék jajan heula rék milu?”
“Embung ah, kateuteuari kudu mayar sorangan.”
“Ku uing mayarna mah, Jin.”
“Enyaan?”
“Sing demi keun nu mayar mah uing ngan duitna ti manéh.”
“Hahahaaa……” (lajengkeuneun) **

One thought on “Tragédi Mahugi (2)

Tinggalkan Balasan

Alamat email Anda tidak akan dipublikasikan. Ruas yang wajib ditandai *

Next Post

Sambut HUT ke-75 RI, Koramil 2401 Rancaekek Bedah Rutilahu

Sel Jul 28 , 2020
Jangan Lupa BagikanVISI.NEWS – Rumah milik Aan Mulkan  warga Kampung Bojongkoneng RT 04/RW 04, Desa Haurpugur, Kecamatan Rancaekek, Kabupaten Bandung, Jawa Barat, tengah direnovasi oleh jajaran Koramil 2401/Rancaekek melalui program Giat Bedah Rutilahu (Rumah Tidak Layak Huni). Danramil 2401/Rancaekek, Kap. Inf. Mamat Raidin mengatakan, kegiatan ini bertalian dengan menyambut HUT […]