Néangan (1)

Jangan Lupa Bagikan

Rékacipta Féndy Sy Citrawarga

“MANI hésé.”
“Naon téa Darsép?”
“Néangan HP nu aya kulkasan, Jin.”
“Hahahaa….”
“Kitu da jelema lieur mah nu lain-ain wé nu dtéangan téh. Nya moal aya atuh Darsép, rék di mana nyimpenna?”
“Ngahaja, Jin. Enya ngahaja ngarah euweuh. Sabab lamun enya aya mah geus moal kabedag sabab pasti hargana mahal.”
“Teu balég pisan si Darsép mah. Ari néangan nu gampang ngarah hasil, nya Bah?”
“Naon téa Jin?”
“Beu, éta Abah nembé naon. Na teu ngabandungan abdi jeung si Darsép ngocoblak?”
“Teuing atuh Jin da Abah geus heubeul tara ka Bandung, sieun korona.”
“Hahaaa……”
“Ari ku randa sieun teu?”
“Nya henteu atuh Ujin da mun sieun mah si Bi Rahi ulah sina ngiluan ngawangkong jeung urang.”
“Hahaaa….”
“Abah onaman……abdi mani dirandakeun pisan.”
“Ari kitu kudu diparawanan, éh diparawankeun Bi?”
“Nya atuh tong randa teuing.”
“Ari enggeus kudu nyebut naon Bi?”
“Janda, kituh.”
“Hahaaa….na béda nyah randa jeung janda, Bi?”
“Nya béda atuh Ujin.”
“Lebah mana bédana Bi?”
“Randa mah teu boga salaki, janda mah teu boga suami.”
“Hahaaa…….”
“Aya deui wé Bi Rahi mah. Numutkeun Abah?”
“Naon téa Jin?”
“Sumuhun néangan?”
“Ceuk Abah mah néangan téh poko kahirupan manusa, malah sakur mahluk hirup siga sato atawa héwan, Jin.”
“Poko kahirupan Bah?”
“Enya, poko kahirupan Jin. Moal pati-pati jelema daraék kaluar ti imah lamun taya nu ditéangan.”
“Lieur Bah ah, teu ngartos pan néangan mah biasana gé sapertos konci murag teu kanyahoan di mana-manana nya perelu ditéangan.”
“Éta mah sabagéan tina néangan Jin. Séjén ti dinya loba deui nu kudu ditéangan nalika jelema hirup. Sok wé pikiran ku ilaing upamana barudak sakola, apan éta téh keur naréangan, nyaéta néangan élmu. Atuh para guru kaluar ti imah muru sakola keur jaman normal mah, apan éta téh aya nu ditéangan, kajaba néangan duit nya néangan budak bodo.”
“Abah onaman piraku néangan budak bodo?”
“Nya enya Jin da geus palinter mah jang naon sarakola.”
“Hahaaa…..”
“Leres Bah, kaolok-olok artos nya ari geus pinter sakola deui mah.”
“Tah kitu, Jin.”
“Dupi patani macul di sawah?”
“Nya pastina néangan paré jadi, Jin.”
“Seratus untuk Bah Adun. Dupi wartawan udar-ider, milarian naon tah?”
“Nya néangan naon deui atuh ari lain néangan berita mah Ujin.”
“Sanés milarian artos?”
“Nya ka dituna mah ka dinya, Jin, nanaon gé da
éta mah kabutuh jalma hirup.”
“Tentara manggul bedil, Bah?”
“Nya néangan musuh atuh Jin, piraku néangan mitoha terus ditémbak mah.”
“Leres wé nya? Cik ari ilaing sok néangan naon Ran?”
“Ka Banjaran ka Cililin, tikerelep nyeri hulu. Nya Diran mah yeuh Kang Ujin, sok resep néangan palu.”
“Keur naon palu, Diran?”
“Ka Panjalu ngadon ulin, aya kohkol lebah cukang. Nya palu mah yeuh Kang Ujin, keur nakol mastaka Akang.”
“Hahahaaa……(lajengkeuneun) **

One thought on “Néangan (1)

Tinggalkan Balasan

Alamat email Anda tidak akan dipublikasikan. Ruas yang wajib ditandai *

Next Post

Pemdes Rancaekek Salurkan BST Periode 2 bagi Warga Terdampak Covid-19

Sen Agu 24 , 2020
Jangan Lupa BagikanVISI.NEWS – Dalam upaya mengurangi dampak pandemi yang belum berakhir, pemerintah melalui Kementerian Sosial kembali menyalurkan BST (Bantuan Sosial Tunai) Periode II (tahap ke-4 dan 5) melalui PT Pos Indonesia (Persero). BST Periode II (tahap 4 dan 5) ini merupakan lanjutan dari Periode I yang sudah selesai pada Bulan Juli. […]