Rékacipta Féndy Sy Citrawarga

“NYA heueuh atuh Darsép.”
“Naon téa Ujin?”
“Ceuk manéh kamari, mung nya kitu buktosna mah seueur nu ngahartikeun merdéka ku hirup bébas. Koruptor taya reureuhna, batan eureuh mah kalah beuki maceuh. Panjara pajejel ku jelema jahat.”
“Enya Sép, lain turutaneun tatéh, saur si Bah Adun.”
“Ceuk manéh, leres Bah, angot nurutan si Ujin mah ulah pisan.”
“Ceuk uing, ah siah Darsép na uing migawé naon maké ulah diturutan?”
“Ulad-alid teu dibaju teu dicalana siah Ujin, abong-abong geus merdéka, ceuk manéh téh.”
“Di mana? Tanya uing.”
“Ceuk manéh, di kamar mandi.”
“Hahaaa…..”
“Ari mandi kudu dibaju dicalana Darsép? Nya ulad-alid atuh satéh!”
“Nu sidik mandi mah kudu disabun, Ujin.”
“Nya muhun atuh Bi, da teu disabun mah angger kareunang. Angot usum korona siga kiwari mah kudu mindeng kukumbah maké sabun. Ceuk ilaing mun mandi kudu kumaha Ran?”
“Kang Dikdik urang Cimindi, meuli kadu ti Tarogong. Anu sidik lamun mandi, mun istri kudu ditoong.”
“Hahaaaa….”
“Hayang turuwisen manéh téh Diran noong awéwé mandi?”
“Nu sidik mah Ujin mun mandi kudu dibanjur cai.”
“Nya heueuh atuh Darsép, lain gé mandi dibanjur leutak mah. Numutkeun Abah?”
“Ceuk Abah mah Jin, mun hirup dijajah deungeun kudu hijrah.”
“Hijrah, Bah?”
“Enya hijrah alias pindah Jin. Tah ayeuna teh urang geus nincak taun anyar 1 Muharam 1442 Hijriah nu mareng jeung tanggal 20 Agustus 2020.”
“Muhun nya ayeuna téh 1 Muharam, teu kakuping nu pawéy obor nya Bah?”
“Pan dianjurkeun ku pamaréntah sangkan ulah ngayakeun raraméan siga pawéy obor keur nyegah korona. Jeungna deui da teu kudu raraméan kitu miéling atawa mapag taun anyar Islam mah, malah mapag taun anyar Maséhi gé sabisa-bisa mah ulah, ngahambur-hambur duit teu puguh. Mending gé muhasabah atawa ngahisab diri, muka deui tapak lacak perjuangan Rosululloh keur bekel urang bajoang sapopoé nu hakékatna mah tetep dijajah.”
“Kitu Bah?”
“Enya Jin. Keur urang kaom muslim di Inonesia, hijrah Rsululloh jeung kamerdékaan téh ngandung atikan moral anu kacida gedéna. Sabab panginditanana tina penjajahan. Kaom muslim jaman Rosululloh dijajah kaom kafir sangkan Nabi ngalirénan dawahna. Bangsa urang diijajah ku bangsa deungeun keur kapentingan maranéhna ku cara ngorowotan harta banda nagara urang.”
“Leres wé nya Bah aya hubunganana.”
“Enya Jin. Duanana gé tinemu hasil jeung kamerdékaan alatan hijrah.”
“Merdéka alatan hijrah Bah?”
“Enya Jin, picontoeun urang saréréa.”
“Leres Bah picontoeun. Mun si Ujin sanés picontoeun.”
“Ah siah Darsép lain picontoeun lebah manana uing?”
“Nya heueuh Ujin. Nabi sareng para pahlawan mah hijrah téh meunang kamerdékaan. Manéh mah meunang kamerekaan da barangdaharna sagala gabres, ka séndok-séndok dihuapkeun.”
“Hahaaa……” (lajengkeuneun) **