Usum Merdéka (5)

Silahkan bagikan

Rékacipta Féndy Sy Citrawarga

 

“KABINA-BINA si Darsép ngagogoréng uing.”
“Ngagogoréng kumaha Ujin?”
“Pan kamari saur si Abah Adun, enya Jin. Duanana gé tinemu hasil jeung kamerdékaan alatan hijrah.”
“Ceuk uing, merdéka alatan hijrah Bah?”
“Enya Jin, picontoeun urang saréréa, saur si Abah téh.”
“Leres Bah picontoeun. Mun si Ujin sanés picontoeun, ceuk manéh téh Darsép.”
“Ceuk uing, ah siah Darsép lain picontoeun lebah manana uing?”
“Nya heueuh Ujin, ceuk manéh téh. Nabi sareng para pahlawan mah hijrah téh meunang kamerdékaan. Manéh mah meunang kamerekaan da barangdaharna sagala gabres, ka séndok-séndok dihuapkeun.”
“Hahaaa……”
“Nya ari henteu mah teu nanaon atuh Jin. Kitu-kitu waé mani murukusunu.”
“Da teu ngeunah atuh digogoréng pajar uing barangdahar sagala gabres, ka séndok-séndok dihuapkeun.”
“Teu ngeunah lebah manana Ujin?”
“Teu ngeunah teu luyu jeung kanyataan da uing mah lain ngahuapkeun séndok wungkul, korsi, méja, pacul, motor disamualkeun kabéh!”
“Hahaaaaa……..”
“Kagok gélo aingah…..sok rék ngomong naon deui Darsép?”
“Rék ngomong naros ka si Abah Jin. Tadi saur Abah boh nalika Nabi dawah boh para pahlawan kénging kamerdékaan alatan hijrah. Maksadna kumaha tah Bah?”
“Kieu Sép. Pan geus dicaritakeun ku Abah gé yéh harita kaom muslim nu jumlahna karék saeutik, tur Rosululloh dawahna rerencepan, ku gegedug Qurés pada ngarah-ngarah nu intina sangkan anjeunna lirén nyebarkeun ajaran Islam. Hartina urang kafir Qurés téh ngajajah, teu méré kabébasan ka Nabi, nya teras Nabi ihtiar kalayan pituduh Gusti Alloh nyaéta hijrah ka Madinah ti Mekah kalayan rerencepan. Sumping ka Madinah pada ngabagéakeun, atuh dawah ogé lugina, hartina merdéka téa. Cacak teu hijrah, nya meureunan dawahna dihalang-halang terus ku kafir Qurés.”
“Oh…kitu Bah dupi para pahlawan?”
“Sarua Jin. Bangsa urang dijajah ku bangsa deungeun, itu ieu diatur ku curuk penjajah. Nya ku tarékah para luluhur urang ngayakeun perlawanan nepi ka derna perang, ahirna bisa merdéka. Tah kamerdékaan éta téh hasil hijrah nyaéta ngarobah nasib dijajah ku cara ngalawan. Cacak lamun teu ngalawan, nya meureun tepi ka kiwati gé angger wé dijajah. Kitu tah Jin.”
“Kahartos Bah janten hijrah téh sanés ngalih tempat waé nya?”
“Enya bener Jin, ngarobah tina pagawéan goréng kana alus, tina masiat kana taat, éta hijrah anu kudu terus dilaksanakeun ngarah salamet, Jin.”
“Sok geura buktikeun ayeuna Jin.”
“Buktikeun naon Darsép?”
“Enya buktikeun hijrah tina goréng kanu alus.”
“Na goréng naon uing?”
“Goréng patut.”
“Hahahaaa…..” (réngsé) **

Baca Juga :  Dibalik Sumpah Pemuda Ada Tiga Hal yang Menjadi Pedoman Dasar

M Purnama Alam

One thought on “Usum Merdéka (5)

Tinggalkan Balasan

Alamat email Anda tidak akan dipublikasikan.

Next Post

Kasus Pemalsuan Dokumen, Pelawak Qomar Jalani Hukuman di Lapas Brebes

Kam Agu 20 , 2020
Silahkan bagikanVISI.NEWS – Pelawak Nurul Qomar resmi menjalani hukuman di Lembaga Kemasyarakatan Kelas-IIB terkait kasus pemalsuan dokumen sarjana-2 (S-2) dan (S-3) sebagai salah satu syarat menjadi rektor di Universitas Muhadi Setiabudhi (Umus) Brebes, Jawa Tengah. Kepala Seksi Pidana Umum Kejaksaan Negeri Brebes, Adhi Hermawan Bolifar mengatakan Nurul Qomar, sebelum resmi […]