Rékacipta Féndy Sy Citrawarga

“NYA atuh kari jadi artis wé, Bi.”
“Enya meureunan Ujin, kudu jadi artis ngarah payu ka duapuluh juta mah.”
“Artis gé artis kumaha nu payu sakitu Bi.”
“Na artis kumaha kitu Ujin?”
“Artis nu bandrosna seungit…..”
“Hahaaa…..”
“Numutkeun Abah?”
“Naon téa Jin?”
“Sumuhun artis nu kacangkalak pulisi, aya nu gara-gara narkoba, aya nu gara-gara kalibet prostitusi online….”
“Nya prihatin wé barudak. Mun diukur ku kacamata agama mah nu kitu peta téh teu sukur nimat, ngaragragkeun darajat. Najan enya teu kabeh artis kitu, tapi saeutikna ngotoran korep kaartisan. Salaku publik pigur sahadéna artis jadi contoh tuladan alus, lain mirucaan teu bener.”
“Leres Bah.”
“Enya Jin. Kitu pangaruh dunya mah barudak. Kageulisan nu kudu disukuri sok kalah disalahgunakeun, nya kitu harta banda ogé nu sakuduna dipaké bekel ibadah sok kalah dipaké salah lampah.”
“Tah kitu Ya, saur si Abah téh. Ulah sok salah lampah. Cik naon waé contona salah lampah téh Ya?”
“Nya banyak Kang Ajan salah lampah atawa lampah salah mah. Antarana ngagasab harta banda jalma.”
“Bener, maling ngaranna. Naon deui Ya?”
“Ngabamblam kalayan narajang manah jalma.”
“Bener, nganyerikeun haté batur. Naon deui Ya?”
“Nyampaan pantat mamah-mamah kalayan sakaparan-paran.”
“Bener, cunihin ngaranna. Naon deui Ya?”
“Ngajak ngabamblam tanpa mayar dan wajar akan saya hajar.”
“Hahahaaa……”
“Sarya gélo, goréng tungtungna! Sok Darsép geura jelaskeun.”
“Jelaskeun naon Ujin?”
“Éta reses di nagara Manaboa téa?”
“Na kumaha kitu?”
“Pan ceuk manéh mangkukna, di nagara Manaboa mah nu ngaran wangunan sakola téh teu béda jeung karaton, dialus-alus. Pan di urang mah tibalik, imah pribadi dialus-alus, angot oknum pajabat mah nya agréng nya di mana-mana, ari wangunan sakola siga kandang hayam.”
“Oh enya Jin. Nya kitu reses di nagara Manaboa mah para anggota déwan téh nampung hatur nuhun sabab kanyataanana mémang rahayat geus taya bangbaluh da fasilitas geus aralus siga wawangunan sakola nu agréng téa Jin.”
“Bisa kitu Darsép?”
“Enya Jin sabab di nagara Manaboa mah nu disebut pamingpin téh enya-enya digawé, utamana merhatikeun kapentingan rahayat. Bisi teu nyaho Jin, pamingpin di nagara Manaboa mah unggal jam kerja tara aya di kantor ucang anggé dina korsi gading.”
“Haaar… atuh tara ngantor mah meureunan bolos téa ngaranna Darsép?”
“His, justru digarawé nyaéta ngapruk ka unggal lembur, ngaprak ka unggal désa. Tah sabot ngapruk téh niténan kaayaan, mun ningali aya logak di jalan harita kénéh dihadéan. Geus puguh deui tatanya ka rahayat bisi can dahar, bisi teu boga duit, bisi gering, jeung sajabana. Terus wé unggal poé kitu……”
“Paingan atuh ari kitu mah.”
“Nya enya, jadi lain dipigawé ngadagoan usul ti rahayat, tapi ngadongdon turni langsung kalayan rotin.”
“Bener tatéh Darsép?”
“Nya bener atuh Ujin.”
“Ceuk saha?”
“Ceuk kahayang.”
“Hahaaaa…….” (réngsé) **